ოცდაათწლიანი ომი 1618-48
ოცდაათწლიანი ომი 1618-48 - პირველი საერთო ევროპული ომი სახელმწიფოთა ორ დიდ კოალიციას შორის ევროპაში პირველობისათვის. კერძოდ, ერთმანეთს უპირისპირდებოდნენ ჰაბსბურგთა ბლოკი (ესპანელი და ავსტრიელი ჰაბსბურგები, გერმანელი კათოლიკე მთავრები, რომის პაპებისა და პოლონეთის მხარდაჭერით) და ანტიჰაბსბურგული კოალიცია (გერმანელი პროტესტანტი მთავრები, საფრანგეთი, შვედეთი, დანია, რომლებსაც მხარს უჭერდნენ ინგლისი, ჰოლანდია და რუსეთი).
ჰაბსბურგთა ბლოკი კათოლიციზმის დროშით გამოდიოდა, ანტიჰაბსბურგული კოალიცია (განსაკუთრებით დასაწყისში) – პროტესტანტიზმის დროშით.
ოცდაათწლიანი ომი იყოფა 4 პერიოდად:
ჩეხური (1618–23), დანიური (1625–29), შვედური (1630–35) და ფრანგულ-შვედური (1635–48), როდესაც საფრანგეთის ომში ჩაბმით აშკარად გამოიკვეთა ანტიჰაბსბურგული კოალიციის უპირატესობა. „მსოფლიო იმპერიის“ შექმნის ჰაბსბურგთა გეგმამ კრახი განიცადა და პოლიტიკური ჰეგემონია საფრანგეთის ხელში გადავიდა.
ოცდაათწლიანი ომმა დიდი გავლენა მოახდინა ევროპული არმიების ორგანიზაციისა და სამხედრო ხელოვნების განვითარებაზე. ომი დასრულდა ვესტფალიის ზავით (1648).
