ტოლშედგენილი ფიგურები
NPLG Wiki Dictionaries გვერდიდან
ტოლშედგენილი ფიგურები – ფიგურები, რომლებიც შეიძლება დაიჭრას ერთი და იმავე რაოდენობის კონგრუენტულ (ტოლ) ნაწილებად. ჩვეულებრივ ტოლშედგენილობის ცნება გამოიყენება მხოლოდ მრავალკუთხედებისა და მრავალწახნაგებისათვის. ტოლშედგენილი ფიგურები ყოველთვის ტოლდიდია. ბოლიაი – გერვინის თეორემის თანახმად (დაამტკიცეს 1832-1833 წლებში) ტოლდიდი მრავალკუთხედები ტოლშედგენილიცაა, ამიტომ ნაწილებად დაჭრით და გადალაგებით შეიძლება ნებისმიერი მრავალკუთხედი გადავაქციოთ მის ტოლდიდ კვადრატად. ტოლშედგენილობის ცნება საფუძვლად უდევს დანაწილების მეთოდს, რომელსაც იყენებენ მრავალკუთხედის ფართობის გამოსათვლელად.
ტოლდიდი მრავალწახნაგები ყოველთვის არ არის ტოლშედგენილი. მაგალითად, კუბი და მისი ტოლდიდი წესიერი ტეტრაედრი არ არის ტოლშედგენილი (ე. წ. დენის თეორემა).
