აბულ-სამსრის ქედი
აბულ-სამსრის ქედი, სამსრის ქედი – მერიდიანული ქედი ახალქალაქის, ნინოწმინდისა და წალკის მუნიციპალიტეტებში. ჩრდილოეთ-სამხრეთის მიმართულებით გადაჭიმულია 42 კმ მანძილზე, სადაც აღმართულია მრავალი ვულკანური კონუსი: აბიხი, დიდი აბული, თავკვეთილი, პატარა აბული, სამსარი, შავნაბადა და სხვ. იგი სამხრეთ საქართველოს ზეგნის „ოროგრაფიულ კეფის” სახელითაა ცნობილი. ქედი ერთმანეთისაგან გამოჰყოფს წალკისა და ფარავნის ტბის ქვაბულებს. ქედის უმაღლესი მწვერვალია დიდი აბული (3301 მ), რომელიც ამავდროულად სამხრეთ საქართველოს ზეგნის უმაღლესი ადგილიცაა. აქ მდებარეობს უღელტეხილები: აბული (ზღვის დონიდან 2317 მ), ტაბაწყური (ზღვის დონიდან 2100 მ). დასავლეთიდან ესაზღვრება ჯავახეთის ზეგანი, ხოლო აღმოსავლეთიდან – წალკისა და ფარავნის ქვაბულები. ქედი ასიმეტრიულია. ფერდობებზე მიმოფანტულია კარკალები. შემორჩენილია ძველმყინვარული ნაშთები. ამჟამად ქედი მთლიანად მოკლებულია ხემცენარეებს და შემოსილია სუბალპური და ალპური მდელოებითა და საძოვრებით.
