ყანის ყაზახა
leucostomum G.Wor.– ყანის ყაზახა
პოლიკარპული მცენარეა, მოგრძო-ოვალური ბოლქვითა და ვიწრო-ხაზური, ღარისებრი, ოდნავ დაკლაკნილი ფოთლებით. მტევანი ოვალურია, კუმსი, 1,5-2 სმ სიგრძის; სტერილური ყვავილები მცირერიცხოვანია, კაშკაშა ცისფერი და მოკლეყუნწიანებია; სანაყოფე ყვავილების ყვავილსაფარი მილისებრ-ოვალურია, მოშავო იისფერი, თავში შემოვლებული აქვს თეთრი არშია; ყვავილსაფრის კბილები თეთრია და გადაღუნული. ნაყოფი მომრგვალო სამწახნაგოვანი კოლოფია, მრავალრიცხოვანი შავი, მობრტყო თესლით.
ყვ. III-IV; ნყ. IV-V.
ირანულ-თურანული სახეობაა. აღწერილია კოპეტდაღიდან მიღებულ ეგზემპლარებზე, რომლებიც კულტივირებული იყო პეტერბურგის ბოტანიკურ ბაღში. ტიპი პეტერბურგში.
საერთო გავრცელება: ირანი, შუა აზია: მთიანი თურქმენეთი (კოპეტდაგი), ამუ დარია, პამირ-ალათაუ (ზერავშანი) (Флора СССР, 1935). კავკასია: აღმ. ამიერკავკასია: აზერბაიჯანი (Гроссгейм, 1940).
საქართველოში გავრცელებულია ქართლში (საქ. მც. სარკვ., 1969). ლიტერატურული მონაცემების თანახმად თბილისის შემოგარენში იზრდება წყნეთისა და მცხეთის მახლობლად (მაყაშვილი, 1953).