საღამოს ტბა
საღამოს ტბა – ტბა ჯავახეთის ზეგანზე, ნინოწმინდის მუნიციპალიტეტში, ზღვის დონიდან 1996 მ სიმაღლეზე.
ზედაპირის ფართობია 4.8 კმ,2
აუზის ფართობი – 528 კმ,2
უდიდესი სიღრმე – 2.3 მ,
წყლის მოცულობა– 7.7 მლნ მ3.
ტბა ტექტონიკური წარმოშობისაა. ზამთარში ტბა იყინება მთლიანად 4-5 თვით. უამრავი დიდდებიტიანი წყარო გამოედინება. წყალი მტკნარია და მდიდარია თევზით (კალმახი, თავდიდა, ნაფოტა, ხრამული დ სხვ.). ვახუშტი ბაგრატიონი აღნიშნავს: „ტბა საღამოსი, დიდი და აღვსილი თევზითა გემოიანითა ამისთვის, რამეთუ არს ანკარა და ქვიანი“. მცირე ინტენსივობით მიმდინარეობს ევტროფიკაციული პროცესები.
XIX საუკუნიდან მოსულმა მოსახლეობამ ტბას ძველი ნასოფლარის დუმას სახელი უწოდა – დუმას ტბა და „დუმაგიოლის“ სახელით იხსენიებდნენ. ეს სახელი დასახლებულ პუნქტს უნდა უკავშირდებოდეს. ვახუშტი ბაგრატიონს საღამოს ტბის სანაპიროზე დატანილი აქვს სოფელი დუმა. ასევე აღნიშნავს ნიკო ბერძენიშვილი საღამოს ტბის სანაპიროსთან ნასოფლარ დუმას. აქედან უნდა იყოს წარმოქმნილი ტბის სახელიც: „დუმანგოლ“ (გოლ თურქულად ტბას ნიშნავს). რუსულ რუკებზე იგი „ტუმან-გოლის“ სახელითაა მოცემული.
