ჰარმონიული რხევა
ჰარმონიული რხევა – რხევა, რომლის დროსაც მახასიათებელი (ფიზიკური) სიდიდე დროის განმავლობაში იცვლება სინუსის ან კოსინუსის კანონით.
ნივთიერი წერტილის ჰარმონიული რხევის დიფერენციალურ განტოლებას აქვს შემდეგი სახე: d2x/dt2+ k2x=0, (k2=c/m); მისი ამონახსნი, ანუ რხევის განტოლება დაყვანილი სახით შემდეგი სახისაა: x=asin(kt+α) ან x=acos(kt+ α), სადაც c, m, k, a, α – მუდმივი სიდიდეებია: c – დრეკადობის (სიხისტის) კოეფიციენტია, m - წერტილის მასა, k -რხევის კუთხური (წრიული) სიხშირე, a - რხევის ამპლიტუდა, (kt+ α) - რხევის ფაზა, α - რხევის საწყისი ფაზა; რხევის პერიოდი T=2π/k; x არის მერხევი სიდიდის მნიშვნელობა დროის მოცემულ მომენტში (მაგალითად, მექანიკური ჰარმონიული რხევისათვის – გადაადგილება ან სიჩქარე, ელექტრული ჰარმონიული რხევისათვის – ძაბვა ან დენის ძალა). რხევის სხვადასხვა სახეთა შორის ჰარმონიულ რხევას უკავია მნიშვნელოვანი ადგილი, რადგანაც ბუნებასა და ტექნიკაში მრავლად გვხვდება ფორმით ჰარმონიული რხევის მსგავსი რხევითი პროცესები.