ერუშეთის ქედი
NPLG Wiki Dictionaries გვერდიდან
ერუშეთის ქედი, (ერუშეთის მაღლობი) – ქედი სამხრეთ საქართველოს ვულკანური ზეგნის დასავლეთ ნაწილში, საქართველოსა (ახალციხისა და ასპინძის მუნიციპალიტეტები) და თურქეთის საზღვარზე. უმაღლესი მწვერვალია გუმბათი (2964 მ). საქართველოს ტერიტორიაზე იგი შემოდის ერუშეთის ქედის ჩრდილო-აღმოსავლეთი კალთით. ხასიათდება ძლიერ დანაწევრებული ზედაპირით. შემორჩენილია ძველმყინვარული ნაშთები. ძირითადი მდინარეებია: ურაველი, ქარზამეთისწყალი, წყალწითელა (მტკვრის მარცხენა შენაკადები), ჯაყისწყალი (ფოცხოვის მარჯვენა შენაკადი) და სხვ. ქედის კალთები შემოსილია ნაძვნარ-სოჭნარით, ზოგან ფიჭვნარი ტყეებით, თხემური ზოლი კი ალპურ-სუბალპური მდელოებითა და მდელო-სტეპებითაა წარმოდგენილი. მდინარე ურავლის აუზში მდებარეობს ქისათიბის დიატომიტის საბადო (ახალციხის მუნიციპალიტეტი).
