აქულა

აქულა (ოს. Акула) – ნართული ეპოსის ოსურ ვერსიის პერსონაჟი, ნართი ბათრაძის ცოლი, შვიდი ძმის ერთადერთი დაჲ, „ცის ნათელი და მიწიერი სილამაზე“. ნართი ახალგაზრდები ქალიშვილისთვის თვალის შევლებაზე ოცნებობენ, მაგრამ ამაოდ. მოხუცმა ურუზმაგმა შეძლო, მოეყვანა იგი ნართების სიმდზე (ცეკვაზე). „იცეკვე ჩემთან, იცეკვე ჩემთან, – თხოვენ ნართი ახალგაზრდები, – მაგრამ აქულა ყოველ მათგანს წუნს დებს“. ბოლოს ქალწულს ბათრაძი მიუახლოვდა. ლამაზმანს ნართი გმირი მოეწონა და უთხრა: „ერთ-ერთი უფროსი ნართი, ვონი, ჩვენმა მტერმა, ყანძარგასმა, დაატყვევა. თუ მას დაიხსნი, არათუ ვიცეკვებ შენთან, არამედ ჩემს ბედსაც დაგიკავშირებ“ (თქმულება – „ნართების სიმდი ანუ როგორ დაქორწინდა ბათრაძი“). ბათრაძმა ვონი დაიხსნა და აქულამაც პირობა შეასრულა.

ლიტერატურა

• Нартовские сказания: Эпос осетинского народа. Книга 3. Владикавказ, 2005;
• Таказов М. Ф. Архетипы солнца в осетинской мифологии // Фундаментальное исследование. Вып. № 10-11/2013.

წყარო

კავკასიის ხალხთა მითები და რიტუალები