ხორხი და ქვედა ხახის დათვალიერება
ხორხი და ქვედა ხახის (Hypopharynx) დათვალიერება — დათვალიერებამდე აუცილებელია ხორხის პალპაცია გარედან მისი მობილურობის და მგრძნობელობის შემოწმება, სიმეტრიუ- ლობის დადგენა.
კარგად გამოცდილი ძველი მეთოდი – სარკით ხორხის დათვალიერება, მოითხოვს საკმაოდ დიდ გამოცდილებას. ხანდახან, ერთი შეხედვით ეს იოლი გამოკვლევა, ძალიან ძნელი ან შეუძლებელიც კი შეიძლება გახდეს, როდესაც პაციენტს აქვს ან ანატომიური თავისებურება (ჰიპერტროფირებული ენის ძირი) ან ღებინების გაძლიერებული რეფლექსი. უფრო თანამედროვე და ინფორმაციული მეთოდი გახლავთ ფიბროლარინგოსკოპია. მისი საშუალებით შეიძლება განისაზღვროს ნებისმიერი პათოლოგიის ზომა და ამასთანავე, შესაძლოა მისი ვიდეო ან ფოტოჩანაწერის გაკეთება, რაც აუცილებელია როგორც პაციენტის დაავადების დინამიკის მონიტორინგისათვის, ასევე კონსილიუმების ჩატარების შემთხვევაში.
თუმცა, რასაკვირველია, ნებისმიერი ოტო-ლარინგოლოგი უნდა ფლობდეს სარკით დათვალიერების ტექნიკას, რომელიც შემდეგში მდგომარეობს:
პაციენტს ერთი ხელით ვუჭერთ ენას და შუბლის შუქის გამოყენებით, მეორე ხელით ხდება ხორხის დათვალიერება გამთბარი სარკით (იმისათვის, რომ არ დაიორთქლოს).
როდესაც არც ფიბროსკოპი და არც სარკით დათვალიერება არ გვაძლევს საკმარის ინფორმაციას (ანატომიური თავისებურებების, ღებინების რეფლექსის გამო) ან როდესაც საჭირო ხდება დამატებით ბიოფსიური ჩარევა, საეჭვო მიდამოს ჰისტოლოგიის დასადგენად, მაშინ საჭიროა განვახორციელოთ პირდაპირი ლარინგოსკოპია ზოგადი ანესთეზიის ქვეშ.
მისი შესრულება სპეციალური, პირდაპირი ლარინგოსკოპით, ფიქსატორით და მიკროსკოპით არის შესაძლებელი.
