ფუნქციის გრაფიკი

ფუნქციის გრაფიკი – მოცემული y = f(x) ფუნქციის გრაფიკი ეწოდება სიბრტყის ყველა იმ წერტილთა ერთობლიობას, რომელთა კოორდინატებია (x; f(x)).

ფუნქციის გრაფიკის ასაგებად საჭიროა ვიცოდეთ მისი შემდეგი თვისებები:

1) ამ ფუნქციის განსაზღვრის არე (x-ის ყველა მნიშვნელობა) და ფუნქციის მნიშვნელობათა სიმრავლე (y -ის მნიშვნელობები);

2) ფუნქციის უწყვეტობის შუალედი და მისი პირველი და მეორე წარმოებულები;

3) ვიკვლევთ წარმოებულების ნიშნებს, ფუნქციის მონოტონურობის შუალედებს, ამოზნექილობისა და ჩაზნექილობის შუალედებს, ექსტრემუმისა და გადაღუნვის წერტილებს;

4) ვეძებთ ფუნქციის ასიმპტოტებს, თუ ისინი არსებობენ;

5) ვეძებთ ფუნქციის მნიშვნელობებს ექსტრემუმის წერტილებში, გადაღუნვის წერტილებში და ზოგიერთ სხვა წერტილში ფუნქციის გრაფიკის საჭირო სიზუსტით ასაგებად.

ამ თვისებების გათვალისწინებით ვაგებთ გრაფიკს, რომელიც მითითებულ წერტილებზე გადის.

წყარო

მათემატიკის ენციკლოპედიური ლექსიკონი