უკავშირო შეერთება
უკავშირო შეერთება – ერთგვარ წევრთა ან რთული წინადადების შემადგენელი ნაწილების შეერთების სახე.
უკავშირო შეერთების დროს, ერთგვარ წევრთა (წინადადებათა) შესაერთებლად არ არის გამოყენებული საგანგებო სიტყვა – კავშირი. ამ შემთხვევაში შეერთების მთავარ საშუალებას წარმოადგენს ინტონაცია.
შერწყმულ წინადადებაში უკავშირო შეერთება ქმნის ღია, დაუხშავ კონსტრუქციას.
უკავშიროდ ერთდება, ჩვეულებრივ, სინონიმური მნიშვნელობის სიტყვები, თუმცა ზოგჯერ – ანტონიმების კავშირიანი წყვილეულებიც: „მზე და ჩრდილი, ნათელი და ბნელი, ტკივილი და ამება ერთმანეთში გაება და ჩაეწნა“…
უკავშირო შეერთება რთულ თანწყობილ წინადადებაში, ჩვეულებრივ, ერთდროული მოვლენების ჩამოთვლისას, ანდა მოვლენათა თანამიმდევრობის გადმოსაცემად გამოიყენება. მეტად იშვიათია უკავშირო შეერთება რთულ ქვეწყობილ წინადადებაში. უკავშირო შეერთების დროს, ჩვეულებრივ, მძიმე გამოიყენება.
კ. გაბუნია
