საარტილერიო გასროლა
NPLG Wiki Dictionaries გვერდიდან
საარტილერიო გასროლა – საბრძოლო მასალა საარტილერიო ქვემეხის გასროლისათვის. ერთი გასროლისათვის საჭირო ელემენტების კომპლექტი: ამფეთქიანი საარტილერიო ჭურვი; სატყორცნი მუხტი დამხმარე დანამატებით (ფლეგმატიზატორით, ალსაქრობით და სხვა) და მაინიცირებელი საშუალებით, რომელიც მოთავსებულია მასრაში ან მუხტის კარტუზში.
გატენის ხერხების მიხედვით განასხვავებენ შემდეგ საარტილერიო გასროლებს:
- უნიტარული გატენის – ჭურვი, სატყორცნი მუხტი და მაინიცირებელი საშუალება გაერთიანებულია ერთ მთელად (გამოიყენება საშუალო და მცირე კალიბრის ზარბაზნებში, რომლებიც ერთი მოქმედებით იტენება; მცირეკალიბრიან გასროლას აგრეთვე ეწოდება საარტილერიო ვაზნა);
- ცალკე – მასრული გატენის – მასრა სატყორცნი მუხტით და მაინიცირებელი საშუალებით არ არის შეერთებული ჭურვთან (გამოიყენება უმთავრესად საშუალო კალიბრის ქვემეხებში, რომლებიც ორი მოქმედებით იტენება); კარტუზული გატენის – ჭურვი, სატყორცნი მუხტი კარტუზში და მაინიცირებელი საშუალება. ისინი არ არან შეერთებული ერთმანეთთან (გამოიყენება საშუალო და მსხვილი კალიბრის ქვემეხებში, რომლებიც სამი მოქმედებით იტენება).