ნოტების გაცვლა
ნოტების გაცვლა − სახელმწიფოთა საგარეო ურთიერთობის ორგანოთა და საერთაშორისო ორგანიზაციათა პრაქტიკაში დიპლომატიური მიმოწერის გავრცელებული ფორმა. გარდა ამისა, ნოტების გაცვლა, თანამედროვე სახელშეკრულებო პრაქტიკაში, წარმოადგენს საერთაშორისო ხელშეკრულებათა დადების გამარტივებულ საშუალებას და გამოიყენება. როგორც წესი, დიპლომატიურ ურთიერთობათა დამყარების, ხელშეკრულების ცალკეული დებულებების დაზუსტების, ხელშეკრულების მოქმედების შეწყვეტის. საკუთრების გადაცემისა და სხვა მსგავს შემთხვევებში. აღნიშნული საკითხების გადაწყვეტისას ხდება ერთი და იმავე შინაარსის მქონე წერილების (ნოტების) გაცვლა. ნოტების იდენტური ტექსტი, რომელშიც მითითებულია ნოტისათვის საერთაშორისო ხელშეკრულების ხასიათის მინიჭების შესახებ, წინასწარ თანხმდება მხარეთა მიერ, თარიღდება ერთი და იმავე რიცხვით, რომელიც ითვლება ნოტის ძალაში შესვლის თარიღად (თუ სსვა რამ არ არის თვით ნოტაში მითითებული), თუ ნოტებში სხვადასხვა რიცხვია მითითებული და არ არის აღნიშნული ძალაში შესვლის თარიღი, იგი ძალაში შესულად ითვლება უკანასკნელი ნოტის მიღების დღიდან. აღნიშნული ფორმით დადებული ხელშეკრულებები შეიძლება ატარებდნენ მემორანდუმის, დეპეშის ან სხვა სახეს. ნოტების გაცვლა საერთაშორისო სამთავრობათაშორისო ორგანიზაციათა სახელშეკრულებო უფლებამოსილების განხორციელების გავრცელებული ფორმაა. მაგ, ნოტების გაცვლის საფუძველზე გაფორმდა გაეროს სპეციალიზებულ ორგანიზაციათა უფლებამოსილების საკითხი, გაეროს საერთაშორისო სასამართლოს წევრთა პრივილეგიებისა და იმუნიტეტის საკითხი. რიგი საერთაშორისო ხელშეკრულებები ძალაში შედის მხოლოდ ნოტების გაცვლის შემდეგ. მაგ., შეთანხმება გაეროსა და აშშ-ს შორის ორგანიზაციის შტაბ-ბინის თაობაზე (ძალაში შევიდა მხოლოდ 1947 გაეროს გენერალურ მდივანსა და გაეროში აშშ-ის მუდმივ წარმომადგენელს შორის ნოტების გაცვლის შემდეგ).
