მაცხვარიშის მაცხოვრის ეკლესია
მაცხვარიშის ეკლესია – ქართული ხუროთმოძღვრების ძეგლი, მაცხვარიშის მაცხოვრის (ამაღლების) ეკლესია, X-XI საუკუნეების ქვით ნაგები ეკლესია სვანეთში, მესტიის მუნიციპალიტეტში, ლატალის თემში, სოფელ მაცხვარისში.
დარბაზულ ეკლესიას მინაშენები აქვს. შესასვლელი დასავლეთ მხარესაა განთავსებული. მართკუთხა კარის თავზე საპირიანი თაღოვანი სარკმელია. ტაძარი მოხატულია მეფე დემეტრე I-ის დროს მიქაელ მაღლაკელიძის მიერ 1140 წელს. ისტორიული თვალსაზრისით განსაკუთრებული მნიშვნელობა აქვს ჩრდილოეთ კედელზე გამოსახულ დემეტრე I-ის მეფედ კურთხევის ცერემონიას. მსგავსი სცენა არ გვხვდება არცერთი ტაძრის მხატვრობაში. ეკლესიაში შემორჩენილია ორნამენტებით შემკობილი ძველი ხის კარი. ეკლესიის გვერდით აღმართული სამრეკლო XVII-XVIII საუკუნეებს მიეკუთვნება. ტაძარში დაცულია მრავალი სიწმინდე, მათ შორის ვერცხლის ჯვარი მეთორმეტე საუკუნის ტიხრული მინანქრებით და სევადით შესრულებული მედალიონებით შემკული. რომელიც ითვლება ბიზანტიური ოქრომჭედლობის ერთ-ერთ მნიშვნელოვან ნიმუშად. ეკლესიას მინიჭებული აქვს ეროვნული მნიშვნელობის კულტურის უძრავი ძეგლის სტატუსი.