კიმოთესუბანი (სოფელი ბორჯომის მუნიციპალიტეტში)
კიმოთესუბანი, ტიმოთესუბანი – სოფელი ბორჯომის მუნიციპალიტეტში, წაღვერის თემში, მდინარე გუჯარეთისწყლის ხეობაში, გვირგვინას ქედის სამხრეთ ფერდობზე, ზღვის დონიდან 1070-1230 მ სიმაღლეებზე, ქ. ბორჯომიდან სამხრეთ-აღმოსავლეთით 17 კმ მანძილზე.
მოსახლეობის რიცხოვნობა – 254. მათი უმრავლესობა (97 %) ქართველია (2002). შემორჩენილია ქართული ხუროთმოძღვრების ძეგლი – სამონასტრო კომპლექსი (XI-XVIII სს.). მთავარი ნაგებობაა ღვთისმშობლის მიძინების ტაძარი (XIIXIII სს.) კედლის მხატვრობით (XIII ს.). იგი ნაგებია მოვარდისფრო აგურით. ტაძრის ჩრდილოეთით შემორჩენილია სამონასტრო ნაგებობის (X-XI) ნაშთები და თლილი ქვით ნაგები დარბაზული ეკლესია (XI ს.) და სხვ. სოფლის სიახლოვეს, მიუვალ კლდეებში გამოკვეთილი სახლებია. ვახუშტი ბაგრატიონი ასე ახასიათებს სოფლის მიდამოებს „გუჯარეთის სოფელს ქუეით კიმოთისმანამდე, თორის წყალზედ, აქათ და იქით, არს კლდე, რომელი აიყრების დიდ-დიდი ფიცარი ფიქალ-ფიქალი შავი, და ბურვენ მით სახლებსა”. 1899 წელს მოეწყო კიმოთესუბნის გლეხთა (მონაწილეობდნენ წაღვერლებიც) აჯანყება მიხეილ რომანოვის წინააღმდეგ, რომლის საუფლისწულო მამული იყო ბორჯომის ხეობა და რომელმაც აქაურ მკვიდრთა მდგომარეობა გააუარესა.
