ენმერქარი
ენმერქარი – (შუამდ.) შუმერული ეპიური თქმულებების გმირი, ნახსენებია მეფეთა სიაში: „ენმერქარ მეშქიაგაშერის ძე, ურუქის მეფე, რომელმაც ურუქი ააშენა, იმეფა 420 წელს“. მამამისი მეშქიაგაშერი, ამავე სიის თანახმად უთუს, მზის ღმერთის ძე არის და, როგორც ჩანს, რომელიღაც დაკარგული მითოსის პერსონაჟი იყო. მასზე ნათქვამია: „ზღვაში შევიდა და მთიდან გამოვიდა“, რაც შეიძლება ასახავდეს მზის ღმერთის დღეღამურ გზას.
ენმერქარი ეპოსშიც უთუს ძედ არის შერაცხილი; იგი არის ინანას ნანდაური, გახაზულია მისი არაჩვეულებრივი წარმოშობა: იგი „ყვითელი ფურის მიერ არის გამოკვებილი მთებში“. ამავე ეპოსში, რომელიც ცნობილია სახელწოდებით „ენმერქარი და არათთას ბატონი“, ენმერქარს მიეწერება ლურსმული დამწერლობის გამოგონება.
ეპოსი მოგვითხრობს ურუქისა და არათთას ურთიერთობის ამბავს. ენმერქარი ცდილობს ურუქს დაუმორჩილოს ეს მდიდარი ქვეყანა. გაიმართება სიტყვიერი პაექრობა, სიტყვიერი ბრძოლა, გამოცანების გაგზავნა ერთმანეთთან, რაც ურუქის მაცნის საშუალებით ხორციელდება და მრავალი წლის მანძილზე გრძელდება. როგორც ჩანს, ენმერქარის სიბრძნე იმარჯვებს და არათთა ემორჩილება ურუქს. ამ ბრძოლაში ენმერქარს ზურგს უმაგრებს ქალღმერთი ინანა, რომელიც წინდაწინვე აღუთქვამს თავის ნანდაურს არათთაზე გამარჯვებას.
