დეფლაცია
დეფლაცია - (deflation), <ლათ. deflation გამობერვა) - ეკონომიკაში ფასების საშუალო დონის დაცემის ტენდენცია ერთობლივი მოთხოვნის დაქვეითების ან საქონლის ღირებულების დაცემის საფუძველზე, საზოგადოებრივი შრომის მწარმოებლურობის ზრდის ან მიმოქცევის არხებიდან ჭარბი ფულის ამოღების ხარჯზე. დეფლაცია ინფლაციის საწინააღმდეგო პროცესი და მასთან ბრძოლის საშუალებაა. მას სახელმწიფო ახორციელებს როგორც ფულად-საკრედიტო, ისე საგადასახადო მექანიზმით. საკრედიტო-ფულად ღონისძიებებს იგი ატარებს საკრედიტო რესტრიქციით, რაც გამოიხატება სარგებლის ნორმის ამაღლებით, კრედიტების ლიმიტირებით, სამომხმარებლო კრედიტის პირობების გაუარესებით და ა.შ. სახელმწიფო ჭარბ ფულს მიმოქცევიდან იღებს, აგრეთვე გადასახადების გადიდებით, ხელფასის „გაყინვით“, სახელმწიფო ხარჯების ზოგიერთი სახეობის შემცირებით და სხვა ღონისძიებებით. დეფლაციური პოლიტიკის გატარება იწვევს ეკონომიკის განვითარების ტემპების შენელებასა და უმუშევრობის ზრდას.
