გლობუსი (თეატრი)
„გლობუსი“ – საჯარო თეატრი ლონდონში. დაარსდა 1599 წელს იარსება 1644 წლამდე. დასს ერქვა „ლორდ-კამერჰერის მსახურები“. ხელმძღვანელი იყო ამ თეატრის მთავარი მსახიობი, ტრაგიკოსი რ. ბერბეჯი. აქ იდგმებოდა შექსპირის და აღორძინების ხანის სხვა დრამატურგთა პიესები.
შენობა წარმოადგენდა ოვალურ მოედანს, რომელსაც გარს ერტყა მაღალი კედელი. შესასვლელთან იდგა ჰერკულესის ქანდაკება, რომელსაც მხრებით ეკავა ცის სფერო ანუ გლობუსი (აქედან წარმოდგა თეატრის სახელიც) კედლის შიდა მხარეს განთავსებული იყო არისტოკრატთა ლოჟები, მათ ზემოთ იყო გალერეა, სადაც ისხდნენ შეძლებული მოქალაქეები. მაყურებელი ფეხზე იდგა სამივე მხარეს მოედნის გარშემო ზოგიერთი პრივილეგირებული მაყურებელი იჯდა პირდაპირ სცენაზე. თეატრი იტევდა 2 ათას ადამიანს. სპექტაკლები იმართებოდა დღის შუქზე, ანტრაქტის გარეშე და თითქმის უდეკორაციოდ. სცენას არ ჰქონდა ფარდა. პროსცენიუმი მაქსიმალურად წინ იყო გამოწეული, სიღრმეში აგებული იყო აივანი (ე.წ. ზედა სცენა), სადაც აგრეთვე თამაშდებოდა სპექტაკლის ეპიზოდებში.
„გლობუსის“ ხის შენობა დაიწვა 1613 წელს. 1614 წელს ააგეს ქვის შენობა. პირველი ბურჟუაზიული რევოლუციის დროს (1642 წ.) პურიტანებმა თეატრი „გლობუსი“ დახურეს, ხოლო 1644 წ. სხვა თეატრებთან ერთად დაანგრიეს. XIX საუკუნიდან დღემდე გლობუსის სახელწოდებით ინგლისში შეიქმნა მრავალი თეატრი, რომლებსაც საერთო არაფერი აქვთ შექსპირისდროინდელ თეატრ „გლობუსთან“.
