ბაუერზაკსი მ.ი.
ბაუერზაკსი მ.ი.(?-?) - სახელმწიფო თეატრის (ოპერა) პრიმა-ბალერინა. საქართველოს დემოკრატიული რესპუბლიკის პერიოდში მისი არაერთი ფოტო დაიბეჭდა ჟურნალებში „თეატრი და ცხოვრება“ და „ხელოვნება“.
იოსებ გრიშაშვილიმა ლექსი მიუძღვნა - „ბაუერზაკსს“ (პატარა სონეტი). 1918 წელს საქართველოს დამოუკიდებლობის გამოცხადების აღსანიშნავ საღამო-კონცერტზე მონაწილეობდა. ამის შესახებ მარო თარხნიშვილის მოგონებებშია აღნიშნული. 1919 წელს სახელმწიფო თეატრის (ოპერა) არაერთი წარმოდგენის მონაწილეა. 26.II.1919, ბალეტმეისტერ ვაკარეცთან ერთად, მისი ბენეფისი იყო ოპერებში „კომელია“ და „ვაკხის გაღვიძება“. 30.V.1919 კი „გრძნეული ფლეიტა“, „საბალეტო დივერტისმენტი“, „ქორწილი მოლოროსიაში“ წარმოადგინეს. 22.VI.1919 ქართულ კლუბში მესხეთ-ჯავახეთის დღე აღინიშნა, სადაც ბალეტი ბაუერზაკსისა და ვაკარეცის შესრულებით დაიდგა. 7.XII.1919 არტისტული საზოგადოების დარბაზში „სახელმწიფო უნივერსიტეტის ბუნებისმეტყველ და აგრონომ სტუდენტთა კავშირის გასაძლიერებლად დიდი საღამო გაიმართება, რომელშიც ბაუერზაკსი და ვაკარეცი მონაწილეობდნენ.
1.XI.1922 ბათუმში, დ. კაზარინის სახალხო მუსიკალურ სტუდიაში ასწავლის. აჭარის სახელმწიფო არქივში ინახება განათლების კომისიის სხდომის ოქმი, რომელშიც დ. კაზარინის სტუდიის გახსნაზეა საუბარი. ოქმში წერია: „პლასტიკა-სუნთქვა; სავარჯიშოები პლასტიკისთვის; ფიგურის მხატვრულად განვითარება; ოპერებიდან, ბალეტებიდან ცეკვები - ბაუერზაკსი (პრიმა-ბალერინა)“.
სალომე ჭანტურიძე
ლიტერატურა
ლ. ინაშვილი, „მოსწავლეთა მუსიკალური განათლების პედაგოგიკური საფუძვლები და მათი სრულყოფის ოპტიმალური საშუალებები“, თელავი, 2008; ჟურ. „ხელოვნება“, 1919, №2; ჟურ. „თეატრი და მუსიკა“, 1919, №1, №15; გაზ. „სახალხო საქმე“, 1919, №555; გაზ. „საქართველოს რესპუბლიკა“, 1919, №45, №115, №133, №277.
წყარო
საქართველოს დემოკრატიული რესპუბლიკა (1918-1921) ენციკლოპედია-ლექსიკონი
