აქციის კურსი
აქციის კურსი - (share price) - ფასი, რომლითაც მოცემულ მომენტში ხდება კონკრეტული აქციონერული საზოგადოების აქციების ყიდვა-გაყიდვა საფონდო ბირჟაზე, საქონლის ბირჟების საფონდო განყოფილებებში, ბანკებსა და საბროკერო კანტორებში. მუდმივად მოქმედი კაპიტალის ბაზრის პირობებში აქციის კურსი, პირველ ყოვლისა, დამოკიდებულია დივიდენდის განაკვეთსა და სარგებლის განაკვეთს შორის თანაფარდობაზე. მაგ., თუ დივიდენდის განაკვეთი უდრის 18%-ს, ხოლო სარგებლის განაკვეთი - 12%-ს, მაშინ აქციის კურსი შეადგენს მისი ნომინალური ფასის 150%-ს, ანუ აქცია 100 დოლარის ნომინალური ფასით ეღირება არანაკლებ 150 დოლარისა. აქციის კურსზე გავლენას ახდენს აგრეთვე აქციონერული საზოგადოების რეპუტაცია, მისი საქმიანობის ფინანსური მაჩვენებლები, ფასიანი ქაღალდების ბაზარზე მოთხოვნის და მიწოდების თანაფარდობა და სხვ. აქციის მრავალი მფლობელი იყენებს საბაზრო და ნომინალური აქციის კურსებს შორის მნიშვნელოვანი სხვაობის ხარჯზე შემოსავლის მიღების შესაძლებლობას, სწრაფად და მომგებიანად ყიდის ამ აქციებს, რის გამოც მიწოდება სჭარბობს მოთხოვნას, აქციის კურსი ეცემა და, პირიქით, რეკლამისა და სხვა ფაქტორების გავლენით, შეიძლება წარმოიქმნას აჟიოტაჟური მოთხოვნა აქციებზე და, შესაბამისად, მკვეთრად გაიზარდოს მათი კურსი. ნომინალურ ფასზე მაღალი აქციის კურსი ემისიური შემოსავლის წყაროა. აქციის კურსის დინამიკაზე დიდ გავლენას ახდენს ქვეყანაში არსებული სოციალურ-ეკონომიკური და პოლიტიკური ვითარება.
