ეკჰოფი კონრად
კონრად ეკჰოფი – (გერმ. Conrad Ekhof, 1720-1778), გერმანელი მსახიობი და თეატრალური მოღვაწე.
სამსახიობო მოღვაწეობა დაიწყო ჰამბურგის დასში, რომელსაც ხელმძღვანელობდა შიონემანი. მასთან შემოქმედებითი უთანხმოების გამო, გადავიდა ჰამბურგის ანტრეპრიზაში, მუშაობდა კ. აკერმანის დასში. 1767-68 წწ. იყო ჰამბურგის ნაციონალური თეატრის მსახიობი. ამ პერიოდში აქვე მოღვაწეობდა გ. ე. ლესინგი, რომელიც დიდად აფასებდა მის ნიჭს და თვლიდა მას თავის თანამოაზრედ. ეკჰოფმა თანდათანობით უარყო თამაშის კლასიცისტური მანერა და გახდა განმანათლებლური ბურჟუაზიული დრამის პირველი ინტერპრეტატორი გერმანულ სცენაზე. ჰქონდა გამომსახველი, ჟღერადი ხმა, ბუნებრივი სიტყვა და ჟესტი, დახვეწილი სცენური ტექნიკა. მან პირველმა გერმანიაში დაამუშავა სცენური ოსტატობის თეორია, იყო პედაგოგი, კრიტიკოსი, თეატრის ისტორიკოსი.
