პენთესილეა

10:38, 3 ივლისი 2017-ის ვერსია

პენთესილეა – (ბერძნ.) ამორძალთა (ამაძონთა) დედოფალი, არესისა და ოტრერეს ასული.

ოდესღაც პენთესილეას უნებლიედ შემოაკვდა თავისიანი (ზოგი მითოგრაფოსი მიიჩნევს, რომ ეს დედოფალი ჰიპოლიტე უნდა ყოფილიყო). დაღვრილი სისხლისგან იგი ტროას მეფემ, პრიამოსმა განწმინდა. პენთესილეა დიდად ემადლიერებოდა პრიამოსს და როდესაც მას შეჭირვების ჟამი დაუდგა, უმალ ისწრაფა მის დასახმარებლად. ეს მაშინ მოხდა, როდესაც ტროას ომი მძვინვარებდა: აქილევსმა ტროელთა გმირი ჰექტორი მოკლა. ტროელები დაიბნენ და სასოწარკვეთილნი ქალაქში ჩაიკეტნენ. მათ მხსნელად პენთესილეა მოევლინა თავისი ამორძალებით. დიდებული სანახავი იყო საომრად შემართული დედოფალი. ოქროცურვილი საბრძოლო აღკაზმულობა არესისგან მიეღო საჩუქრად. მზეზე ბზინავდა მისი შუბი და მუზარადი.

პენთესილეამ ცნობილი გმირები გაიწვია ბრძოლის ველზე, ბევრი დახოცა, ხოლო როდესაც თავისი რაზმით ბერძენთა ხომალდებს მიუახლოვდა, მასთან თავად აქილევსმაც კი იკადრა შებმა. ასე ამბობენ, არწივისა და მტრედის შეხლას მოჰგავდაო მათი შეხვედრა. მედგრად იბრძოდა პენთესილეა, მაგრამ მაინც ვერ გადაურჩა სახელოვანი გმირის მამაკაცურ ძალმოსილებას. ოროლი სტყორცნა აქილევსმა და ერთი დაკვრით განგმირა ამორძალიც და მისი ცხენიც.

ტროელებმა ღირსეული პატივი მიაგეს დედოფალ პენთესილეას.

წყარო

მითოლოგიური ენციკლოპედია ყმაწვილთათვის