ჰიპოლიტე
ჰიპოლიტე – (ბერძნ.) ამორძალთა (ამაძონთა) დედოფალი. არესისა და ნიმფა ჰარმონიას ასული. მის შესახებ ჰერაკლესა და თესევსის მითები მოგვითხრობენ.
დედოფალი ჰიპოლიტე თავისი მშვენიერებითა და სულის სიმედგრით გამოირჩეოდა თემისკირელ ამორძალთა შორის. მას არესმა ღვთაებრივი სარტყელი აჩუქა, რომელიც სამეფო ძალაუფლების სიმბოლოც იყო. სწორედ ეს სარტყელი უნდა მოეპოვებინა ჰერაკლეს, როდესაც იგი ამორძალთა ქვეყნისაკენ გაეშურა (ჰერაკლე, გმირობა მეცხრე). მითოსის ერთი ვერსიით, ჰერაკლემ მოკლა ჰიპოლიტე და მის სარტყელს დაეპატრონა. სხვა ვერსიით კი, ამორძალებმა სასტიკი ბრძოლა გაუმართეს ბერძენ გმირს. ჰერაკლემ ტყვედ ჩაიგდო ჰიპოლიტე და თესევსს უძღვნა. მისი სარტყელი კი ევრისთევსს ჩაუტანა.
არსებობს ისეთი მითოსიც, რომლის თანახმადაც თესევსი თავად გაეშურა ამორძალთა წინააღმდეგ საბრძოლველად, დაამარცხა ისინი, დედოფალი ჰიპოლიტე კი ტყვედ წაიყვანა ათენში. ამორძალებმა განიზრახეს, ენახათ თავიანთი დედოფალი. ისინი შეიჭრნენ ატიკაში, ათენსაც მიაღწიეს, მაგრამ არესის ბორცვთან ბრძოლისას დამარცხდნენ.
ასე დარჩა ათენში ჰიპოლიტე, რომელსაც თესევსისაგან შეეძინა შვილი, ჰიპოლიტოსი. თესევსისა და ფედრას ქორწილზე მონადიმეებს შეიარაღებული გამოეცხადა ამორძალთა ამაყი დედოფალი, რომელიც იქვე მოკლეს მცველებმა.
