გრეიპფრუტი პერნამბუკო

23:44, 16 მარტი 2021-ის ვერსია

გრეიპფრუტი პერნამბუკო - ჩვეულებრივი გრეიპფრუტის მოყვანილობისაა;

ნაყოფი საკმაოდ დიდია, ოდნავ ბრტყელი, წონა 250 გრამამდეა, ყვითელი ფერისაა, არაწესიერია, სიმაღლე – 9,0 სმ, დიამეტრი – 9,7 სმ. ზედაპირი გლუვი აქვს. ჩამჯდარი, თანაბარ ეთერზეთოვანჯირკვლებიანი. ნაყოფის წვერი ჩაღრმავებულია, მცირებორცვიანი, რადიუსისებრი ღარებით; ფუძე სწორია, ფართო, ნაცრისფერი დინგის სვეტის კვალით, არაწესიერი და პატარა უჯირკვლო რკალით.

კანი საკმაოდ სქელია 1,0 სმ-მდე, ზედაფენი ეთერზეთოვანი ჯირკვლების მწკრივითაა შემორკალული. ქვედა თეთრი ფერისაა, ფუყე აღნაგობისა, ნაკლებად მწარე და მწკლარტე, შებმულობა რბილობთან საშუალო აქვს. გულის ღერძი დიდია 2 სმ. იგი ამოვსებულია და ჭურჭელბოჭკოვანი კონებით არის შემორკალული. აპკები გულთან უფრო მაგარი და უხეშია, სეგმენტები 13-ია, არათანაბარი, მახვილსოლისებრი, განაკვეთზე ღია ლიმონისფერისაა, ურთიერთშებმულობა მეტად მჭიდრო აქვს. საწვნე უჯრედები გრძელია, მსხვილი და უწესო ფორმისა, წაწვრილებული, ძაფისმაგვარი ბოლოებით.

წვენი უხვად იცის, გემო სასიამოვნოდ მომჟავო-მოტკბილოა, სიმწარე მხოლოდ შემდეგ გადაჰკრავს. სირბილე მსხვილმარცვლოვანი და მოთავსებულია მეტად ნაზ აპკებში. სასიამოვნო გემოსია, სიტკბოს, სიმჟავის და სიმწარის კარგი შეზავებით.

თესლი მრავალი აქვს, 65-მდე, ისინი პოლიმორფულია და გაბრტყელებულია წვერისაკენ. გარე გარსი მეტად უხეში აქვს, შიგა – ვარდისფერი, საფარი ქალაძასთან მუქი-ვარდისფერია. საკმაოდ დიდი, თეთრი ლებნები რამდენიმე აქვს (5–6), ჩანასახი პატარაა და თეთრი. ეს ჯიში ადვილად ავადდება ფოთლების სიჭრელით და ამის გამო სამრეწველო მნიშვნელობა ნაკლები აქვს.

წყარო

საქართველოს კულტურული ფლორის ატლასი = Атлас культурной флоры Грузии = Atlas for the cultivated Flora of Georgia / ნ. ხომეზურიშვილი და ელ. ერისთავი ; საქართველოს სსრ მიწსახკომი. ლ.პ. ბერიას სახელ. სას.-სამ. ინსტიტუტი. ტ. 3 : ციტრუსები / ე. თოფურიძე, მ. ტაბლიაშვილი და ვ. შანიძე ; რედ. და წინასიტყვ. ავტ.: ნ. კეცხოველი.