შანიძე ალექსანდრე
NPLG Wiki Dictionaries გვერდიდან
შანიძე ალექსანდრე − (1907 − 1994), ქართველი პოეტი. დაიბადა სოფელ ზემონოღაში (სამტრედია). სწავლა დაიწყო სამტრედიის სკოლაში, საშუალო სკოლა კი 1926 წელს დაამთავრა თბილისში (მე-2 ვაჟთა გიმნაზია). 1932 წელს დაამთავრა თბილისის სახელმწიფო უნივერსიტეტი. 1941 წელს გაიწვიეს სამხედრო სამსახურში და მონაწილეობა მიიღო მეორე მსოფლიო ომში. პირველი წიგნი „ლექსები” 1928 წელს გამოაქვეყნა. ეკუთვნის ძირითადი პოეტური კრებულები: „მეჩვიდმეტე” (1934), „ლექსები” (1937), „საბრძოლო სიმღერები” (1943), „სიყვარულმა მათქმევინა” (1955), „გულისნადები” (1962), „რაც მინატრია” (1967), „სახატე მზის და ვარდისა” (1975), „ნატვრისთვალი” (1977), „არდავიწყება” (1980).
- * * *
- ვგავარ რიჟრაჟზე აფრენილ მერცხალს,
- მოჭიკჭიკეს და მკერდზე ხალიანს.
- თქვენ შორის ერთი მებრძოლი მეც ვარ
- და ჩემი ქვეყნის მზე მიხარია.
- როცა მოვკვდები, თქვით, რომ ჩემს გულსაც
- შეუცდომელი ჰქონდა გუმანი,
- რომ მე მშვენებით მხიბლავდა უშბა
- და თბილ კოლხეთის მწვანე უბანი.
- თქვით, მაცოცხლებდა ალაზნის ჩქერი,
- მოდინახე თუ ნასაკირალი...
- მე საქართველოს დიდებას ვმღერი,
- ამაში რაა გასაკვირალი!
- ვგავარ რიჟრაჟზე აფრენილ მერცხალს,
- მოჭიკჭიკეს და მკერდზე ხალიანს.
- თქვენ შორის ერთი მებრძოლი მეც ვარ
- და ჩემი ქვეყნის მზე მიხარია.