შაიშმელაშვილი თამარ
შაიშმელაშვილი თამარ − (1966), პოეტი, ჟურნალისტი, რევაზ ინანიშვილის სახელობის „ერთი მოთხრობის“ კონკურსის დამაარსებელი. დაიბადა სოფელ ტიბაანში (სიღნაღი). 1989 წელს წარჩინებით დაამთავრა თსუ-ს ჟურნალისტიკის ფაკულტეტი. 1990 წლიდან მუშაობს ჟურნალისტად ქართულ მასმედიაში. 2013 წლიდან დღემდე ლიტერატურულ ჟურნალ „ანეულის“ (ყოფილი „ხელეური“, 2009-2012) დამაარსებელი და მთავარი რედაქტორია. მისი პირველი ლექსები გამოქვეყნდა უნივერსიტეტის ალმანახ „პირველ სხივში“, შემდეგ − თითქმის ყველა ლიტერატურულ ჟურნალ-გაზეთში. გამოცემული აქვს 5 პოეტური კრებული: „სიზმარში ცხადი“, „ობოლი ვარსკვლავები“, „სიჩუმე მზეში“, „ჩამოთოვლილი ზარები“, „სულალუბლები“. თამარ შაიშმელაშვილის ლექსები შესულია „უახლესი ქართული პოეზიის ანთოლოგიაში“ („ეროვნული მწერლობა“, 2009), ასევე პირველ ინგლისურენოვან ანთოლოგიაში: „თანამედროვე საქართველო – პროზა და პოეზია“ (2017).
- ხაშმი
- რევაზ ინანიშვილს
- სულის ტკივილია ხაშმი,
- ცრემლით საგოდებელს გაშლის...
- ყველა ნაბილიკარს ვჩემობ,
- როგორ დაბზარულხარ, ჭერო...
- ქარი სამერცხლურებს არ შლის,
- მთელი სამყაროა ვალში
- ამ მზის, ამ მთების და... სევდის,
- ივრის ჩქერალებში შემხვდი,
- ივრის ყაყაჩოებს შავშლილთ
- რიდეს მოულოცავს შაშვი...
- სადღაც ცისკიდურთან ახლოს,
- ნისლის ენძელებთან სახლობ...
- სულის საგოდებელს გავშლი −
- ჩემი სიმღერაა ხაშმი...
