სემელე
NPLG Wiki Dictionaries გვერდიდან
სემელე – (ბერძნ.) თებეს მეფის, კადმოსისა და ჰარმონიას ასული. ინოს და, ზევსის სატრფო და დიონისეს დედა. ვარაუდობენ, რომ სემელე მიწის უძველესი ფრიგიული ქალღმერთი იყო.
ყველაზე ცნობილი მითოსი სემელეზე დიონისეს დაბადების ამბავს გვამცნობს: ზევსს შეუყვარდა მშვენიერი სემელე და მოკვდავის სახით იწყო მასთან გამოცხადება. მუცლადღებული მეფის ასული ეჭვიანმა ჰერამ იმსხვერპლა. იგი მეხისტეხაში დაიღუპა (დიონისე), მაგრამ გადარჩა მისი შვილი, დიონისე და როდესაც წამოიზარდა, მიწისქვეშა სამეფოდან ამოიყვანა ძვირფასი დედა, თიონე უწოდა და ოლიმპოსზე დაავანა უკვდავთა შორის.
სემელეს კულტს დიდხანს სცემდნენ თაყვანს თებეში. ხოლო მითოსი სემელეზე და დიონისეს დაბადებაზე მრავალ ქმნილებაში აისახა (ევრიპიდეს „ბაკქი ქალები“. ნონოსის პოემა „დიონისიაკა“ და სხვა).
