რეზინი
რეზინი – (ლათ. resina ფისი), მასალა, რომელიც მიიღება კაუჩუკის ვულკანიზაციით. ის კონსტრუქციული მასალაა აღჭურვილი უნიკალური თვისებების კომპლექსით, რომელთაგან ყველაზე მნიშვნელოვანია ელასტიკურობა ტემპერატურის დიდ დიაპაზონში.
გოგირდის შემცველობის მიხედვით არჩევენ რბილ (1-3% გოგირდი) და ნახევრადმაგარ ან მაგარ (30% გოგირდი) რეზინს. სპეციალური თვისებებიდან მნიშვნელოვანია თბო-, ბენზინ-, ცხიმ-, ყინვამედეგობა, აგრეთვე მედეგობა რადიაციისა და აგრესიული გარემოს (ტუტეები, ჟანგბადი, ოზონი) მიმართ. რეზინის მექანიკური თვისებები დამოკიდებულია მისი ნარევისა და შემავსებლების ტიპზე, რომლის მიხედვით რეზინი ყოფენ ორ ჯგუფად:
1. საერთო დანიშნულების (საბურავები, ლენტები, ქამრები, ხელთათმანები, საყოფაცხოვრებო ნივთები და სხვ.);
2. სპეციალური დანიშნულების (აღჭურვილი სპეციალური თვისებებით).
მშენებლობაში რეზინს იყენებენ სადებებად, ქვესადებებად, ჰერმეტიზაციისა და იზოლაციისთვის გადახურვებში, სარდაფებში, საძირკვლებში, კედლებსა და სვეტებში ანტისეისმურ დემპფერებად და ა.შ.