ნაშხეფბეტონი
NPLG Wiki Dictionaries გვერდიდან
ნაშხეფბეტონი – ცემენტის, ქვიშისა და ხრეშის (ღორღის) მშრალი ნარევი, რომელიც საჭირო ზედაპირზე დაიტანება დაშხეფებით 4-6 ატმ. წნევის ქვეშ. ნარევი შლანგიდან გამოსვლის წინ წყლით სველდება. იგი 100-120 მ/წმ სიჩქარით ეშხეფება დასაბეტონებელ ადგილს და ეკვრის მას, რითაც ქმნის ბეტონის მტკიცე ფენას. ნაშხეფბეტონის თითოეული ფენის მინიმალური სისქეა 25-30 მმ. მისი დატანა ხდება ჰორიზონტალურ ზოლებად ქვევიდან ზევით. ზოლების სიგანე მექანიზებული დაშხეფებისას უნდა იყოს 40-50 სმ, ხოლო ხელით დაშხეფებისას – 60-70 სმ. ნაშხეფბეტონის მოწყობის ტექნოლოგია თავისებური პროცესია, რის გამოც მის შემადგენელ ნაწილებს წაეყენება სპეციფიკური მოთხოვნები. ნაშხეფბეტონი ძირითადად გამოიყენება გვირაბებში დროებით და მუდმივ სამაგრებად.
