მღვდლიაშვილი თინათინ
NPLG Wiki Dictionaries გვერდიდან
მღვდლიაშვილი თინათინ − (1955), პოეტი, მხატვარი, საზოგადო მოღვაწე. დაიბადა ქუთაისში. დაამთავრა თბილისის 55-ე საშუალო სკოლა, შემდეგ – თანამედროვე და ტრადიციული ხელოვნების კოლეჯი, მასობრივ ღონისძიებათა რეჟისურის განხრით. მუშაობდა მსახიობად. არის მხატვარი და მხატვართა კავშირის წევრი. ავტორია წიგნებისა: „დე, ვიყო ზეცამდე მართალი” (1996), „აპოთეოზი” (2002), „მომიგონე მე” (2007), „მარტოხელა, მარტოსულო ქალბატონო” (2008), „100 ლექსი” (2008), „ხმალი ავლესოთ, ქართველებო” (2011), „მთელი თბილისი ციხეშია, ანუ საკანი №7” (2015).
- * * *
- ჭრელ კაბაში დაგაბეროს ღმერთმა,
- ფარად მოგცეს არწივივით ქმარი...
- შეგიყვაროს კაცმა ერთადერთმა,
- მარად იყოს სიყვარულით მთვრალი!..
- იყავ მშვიდი, მორჩილი და მთმენი,
- შეგიყვაროს კაცმა ერთადერთმა...
- ბედნიერად ჩაგემარცვლოს დღენი,
- ჭრელ კაბაში დაგაბეროს ღმერთმა!..
- როგორ გშვენის ლერწმის ტანზე ფარჩა,
- ვიწრო წელზე გიშრისფერი თმები,
- ღვთისმშობელი აგარიდებს ავდარს
- და მფარველი ანგელოზის ფრთები.
- აშრიალე ლერწმის ტანზე ფარჩა,
- აფრიალე თმები გიშრისფერი...
- ქვეყანაზე არსად აღარ დარჩა,
- ერთი ქალიც, - შენი ფეხის მტვერი.
- ჭრელ კაბაში დაგაბეროს ღმერთმა!..