მუდროსის დაზავება 1918
მუდროსის დაზავება 1918 – ხელი მოაწერეს 30. X პორტ მუდროსში (კუნძ. ლემნოსი) ბრიტანეთის სამხედრო ხომალდ „აგამემნონზე“ დიდი ბრიტანეთის (როგორც ანტანტის სახელმწიფოთა რწმუნებულის) და თურქეთის სულთნის მთავრობის წარმომადგენლებმა. პირველ მსოფლიო ომში 1914-18 დამარცხებული თურქეთი იძულებული გახდა, მიეღო მისთვის თავსმოხვეული მძიმე პირობები: შავი ზღვის სრუტეების გახსნა ანტანტის სახელმწიფოთა ფლოტებისათვის და მათ მიერ ბოსფორისა და დარდანელის ფორტების, ასევე ბაქოსა და ბათუმის ოკუპაცია; იმ თურქული გარნიზონების ჩაბარება, რომლებიც ქვეყნის ფარგლებს გარეთ იმყოფებოდნენ: თურქეთის ჯარების ევაკუაცია ირანიდან, ასევე მათ მიერ დაკავებული ამიერკავკასიის ნაწილიდან და კილიკიიდან; არმიის დემობილიზაცია და ანტანტისათვის იმ სამხედრო ხომალდების გადაცემა, რომლებიც თურქეთის წყლებში ან მისი ფლოტის მიერ დაკავებულ წყლებში იმყოფებოდნენ და სხვ. მუდროსის დაზავებამ ძალა დაკარგა მუდანიის დაზავების 1922 ხელმოწერის შემდეგ.
