მოძრავი ფარი
მოძრავი ფარი – კომბინირებული კინოგადაღების ერთ-ერთი ცნობილი სახეობა. მოძრავი ფარით შესაძლებელია სამსახიობო სცენების შეთავსება პრაქტიკულად ნებისმიერ ფონთან: მაკეტებთან, სურათებთან, ფოტოსურათებთან, პეიზაჟებთან ანდა ადრე გადაღებულ პოზიტიურ გამოსახულებასთან.
კომბინირებული გადაღების სხვა მეთოდებისაგან განსხვავებით მოძრავი ფარით შესაძლებელია არა მარტო მსახიობის (ან სამსახიობო სცენების) შეთავსება რომელიმე ცალკე, გადაღებულ ფონთან (როგორც ხდება, მაგალითად, რირპროექციის ან ტრანსპორტის საშუალებით), არამედ მსახიობს შეუძლია იმოძრაოს თვით მაკეტში, ფოტოსურათში, ნახატში, პეიზაჟში, ადრე გადაღებულ პოზიტიურ გამოსახულებაში. მოძრავი ფარით მსახიობის გადაღება წარმოებს მხოლოდ პავილიონში, ხოლო ეკრანზე. მსახიობი მოქმედებს მღელვარე ზღვაში, მონაწილეა გადაღებისათვის სახიფათო მაღლივ ობიექტებზე, საჰაერო სივრცეში და ა. შ. მოძრავი ფარით სარგებლობენ იმ კადრების შესაქმნელად, რომლის გადაღება ჩვეულებრივი კინოგადაღებით შეუძლებელია. მოძრავი ფარით გადაღების არსი შემდეგში მდგომარეობს: გადაღებას აწარმოებენ სპეციალური კინოკამერით ორმაგ ექსპოზიციაში, რომელიც სრულდება ორ ეტაპად ორ ფირზე: ჩვეულებრივ ნეგატიურზე (შავ-თეთრი ან ფერადი) და სპეციალურ ინფრაქრომატიულ ნიღაბიან ფირზე, რომელიც მგრძნობიარეა მხოლოდ ინფრაწითელი სხივებისადმი. ინფრაწითელ შუქს ასხივებს პავილიონში საგანგებოდ აგებული ე. წ. ინფრაეკრანი. ინფრაწითელი სხივები თვალისათვის და ნეგატიური ფირისათვის უხილავია. სამსახიობო მიზანსცენას აგებენ ინფრა-ეკრანის ფონზე.
