მიმდევრობა (მათემატიკა)
მიმდევრობა – ნატურალურ (N) რიცხვთა სიმრავლეზე მოცემული ფუნქცია; ჩვეულებრივ ასე აღინიშნება: a1,a2,...,an,... ან {an}, nϵN. მიმდევრობის შემადგენელ ელემენტებს მიმდევრობის წევრები ეწოდება. ხშირ შემთხვევაში მიმდევრობა განისაზღვრება მისი n - ური წევრის საშუალებით ან რეკურენტული ფორმულით, რომლითაც ყოველი მომდევნო წევრი განისაზღვრება წინა წევრის საშუალებით.
მიმდევრობის ცნება წარმოადგენს ზღვართა თეორიის კვლევის ძირითად ობიექტს.
თუ რიცხვით {an} მიმდევრობას აქვს ზღვარი, მაშინ მიმდევრობას ეწოდება კრებადი, თუ ზღვარი არა აქვს (ან უსასრულობაა, ან არ არსებობს), მაშინ მიმდევრობას ეწოდება განშლადი.
{an} მიმდევრობას ეწოდება ზრდადი, თუ ნებისმიერი n -თვის სამართლიანია დამოკიდებულება an+1 ≥ an.
{an} მიმდევრობას ეწოდება კლებადი, თუ ნებისმიერი n -თვის სამართლიანია დამოკიდებულება an+1 ≤ an.
მონოტონური მიმდევრობა – ზრდადი ან კლებადი მიმდევრობის ზოგადი სახელწოდება.
განშლადი მიმდევრობა – რიცხვითი მიმდევრობა, რომელსაც არ გააჩნია სასრული ზღვარი.
რიცხვითი მიმდევრობა – ნატურალური რიცხვების სიმრავლის ცალსახა ასახვა ნამდვილ ან კომპლექსურ რიცხვთა სიმრავლეში.
ფუნქციონალური მიმდევრობა – ნატურალური რიცხვების სიმრავლის ცალსახა ასახვა ფუნქციათა სიმრავლეში.