კრიშნა
კრიშნა – (ინდ.) „შავი“, „მუქი“, გმირი, ვიშნუს ერთ-ერთი ავათარა. ეპიურ თქმულებებში ადამიანთა შემწედ და მხსნელად გვევლინება. მათჰურას უკეთური მეფის კანსას დასასჯელად კრიშნა ადამიანის სახით მისი ნათესავის ოჯახში მერვე შვილად იბადება. მეფეს მოახსენებენ წინასწარმეტყველებას, რომ მას სწორედ მერვე შვილი მოუღებს ბოლოს. მეფე დახოცავს ყველა დაბადებულს ამ ოჯახში, გარდა კრიშნასი, რომელსაც მწყემსის ოჯახში გადამალავენ. ამას რომ გაიგებს, მეფე ბრძანებს მათჰურაში ყველა ბავშვის მოკვლას. მაგრამ კრიშნა გადარჩება და, საბოლოოდ, აღასრულებს თავის მისიას – მოკლავს უკეთურ მეფეს და დაამყარებს სამართლიან ხელისუფლებას მათჰურაში.
კრიშნას ჰყავს ფანტასტიური რაოდენობის (16100) ცოლი და ურიცხვი შთამომავლობა. როცა დაასრულებს თავის მოღვაწეობას დედამიწაზე, კრიშნა დააპირებს ღვთიურ სამყაროს წასვლას, მაგრამ უკანასკნელი ბრძოლის გადახდის შემდეგ შეცდომით იღუპება მონადირის ხელით, რომელსაც იგი ირმად მოეჩვენა.
