კრეტის ხარი
NPLG Wiki Dictionaries გვერდიდან
კრეტის ხარი – საოცარი სილამაზის ხარი, რომელიც კრეტის მეფე მინოსს მსხვერპლად უნდა შეეწირა პოსეიდონისთვის. მაგრამ დაენანა მინოსს იგი და მის ნაცვლად სხვა ხარი შესწირა მსხვერპლად დიდ ღმერთს. განრისხდა პოსეიდონი და ეს მშვენიერი ცხოველი გააშმაგა. გამძვინვარებული ხარი წარმოუდგენელი სისწრაფით დაქროდა მთელ კუნძულზე და ყველაფერს აჩანაგებდა. მხოლოდ გმირთაგმირმა ჰერაკლემ შეძლო მისი შეპყრობა და მიკენში ჩაყვანა (ჰერაკლეს მეშვიდე გმირობა). ევრისთევსი დაფრთხა და ხარის გაშვება ბრძანა. ხარმა გადაირბინა მთელი პელოპონესოსი და ატიკაში, მარათონის ველზე ხელთ ჩაუვარდა თესევსს, რომელმაც იგი აპოლონს შესწირა მსხვერპლად.
