კონვეიერი
კონვეიერი −(ინგლ. conveyor < convey გადატანა), ტრანსპორტიორი, უწყვეტი მოქმედების დანადგარი, რომელიც განკუთვნილია ფხვიერი, ნაჭროვანი (ნატეხოვანი) ან საცალო ტვირთების გადასაადგილებლად. კლასიფიცირდება წევისა და ტვირთმზიდი ორგანოების მიხედვით. განასხვავებენ კონვეიერს ლენტური, ჭავლური, ბაგირუ-ლი და სხვა წევის ორგანოებითა და წევის ორგანოების გარეშე – ვიბრაციული, ინერციული, მუხლუხა, ხრახნული და სხვ. ტვირთმზიდი ორგანოს მიხედვით – დისკოიანი, ლენტიანი, ურიკიანი, ფირფიტებიანი, ციცხვიანი, ხვეტიებიანი და სხვ. კონვეიერი გამოიყენება მრეწველობის სხვადასხვა დარგში დატვირთვა-გადატვირთვის სამუშაოებზე, უწყვეტი ტექნოლოგიური პროცესების უზრუნველსაყოფად, ნაკადურ წარმოებაში (მაგ., რკინაბეტონის ნაკეთობების) რიგი ოპერაციების მიმდევრობით შესრულებისას. კონვეიერი წარმოადგენს ერთ-ერთ ძირითად საშუალებას წარმოების კომპლექსური მექანიზაციისა და ავტომატიზაციისათვის.
