კემბრიჯის სკოლა (ეკონომიკა)
„კემბრიჯის სკოლა“ - (Cambridge School) - ცნობილი ინგლისელი ეკონომისტის ა. მარშალის ნაშრომების გავლენის არეალში მყოფი ეკონომისტთა ჯგუფი. თავდაპირველად ამ სკოლის წარმომადგენლები იყვნენ ა. პიგუ, დ. რობერტსონი და ჯ.მ. კეინზი. ამასთან, კეინზის მეცნიერულმა მიღწევებმა საფუძველი ჩაუყარა კემბრიჯის თანამედროვე სკოლას, რომელიც კრიტიკულად არის განწყობილი ნეოკლასიკური თეორიის, კერძოდ, პ. სამუელსონისა და რ. სოლოუს ნაშრომების მიმართ (ეს სკოლა პ. სამუელსონსა და რ. სოლოუს დღეს მიიჩნევს ნეოკლასიკური მიმდინარეობის მთავარ წარმომადგენლებად). ამ წინააღმდეგობამ წარმოქმნა დისკუსია XX საუკუნის 30-იან წლებში და გრძელდება დღესაც. თანამედროვე კემბრიჯის სკოლას მიაჩნია, რომ ეკონომიკურ მოდელში გასათვალისწინებელია არა მხოლოდ წმინდა ეკონომიკური, არამედ ისტორიული, სოციოლოგიური და ფსიქოლოგიური ფაქტორები. ამ სკოლის თვალსაჩინო წარმომადგენლები არიან ჯ. რობინსონი, ნ. კალორი, რ. კანი, პ. სრაფა და სხვები. ამასთან, მათ მიმდევრები ჰყავთ აშშ-ში, კანადაში, იტალიასა და ავსტრალიაში.
