კავკასიური აკაკი
კავკასიური აკაკი - (Celtis caucasica Willd = Celtis australis subsp. Caucasica [Willd.] C.C. Towns.); ოჯახი: აკაკისებრნი (Celtidaceae). 10 მ-მდე სიმაღლის ხეა, იშვიათად – ბუჩქი. ფოთლები 3-10 სმ სიგრძისაა და 1.5-5 სმ სიგანის, მოყვანილობით კვერცხისებური ან მოგრძო-რომბულია, ტყავისებური. წვერი მოკლედ წაწვეტებული, ზემოდან ხაოიანი და უფრო მუქი, ქვედა მხარეზე მოყვითალო ელფერის, მეტ-ნაკლებად შებუსული, კიდეებზე მრგვალხერხკბილა. ნაყოფი სფეროსებურია, მოწითალო ყვითელი. ყვ. III-IV; ნაყ. IX-X. კახეთის რეგიონში საკმაოდ გავრცელებული მცენარეა, განსაკუთრებით – მთისწინეთისა და დაბლობის ტყეების ზონაში. გვხვდება ქვიან და კლდოვან ადგილებზე, ასევე ხშირია ძველი სასაფლაოებისა და ეკლესიების მიდამოებში. კახეთში მისი ნახვა შესაძლებელია არწივის ხეობაში, სოფელ კურდღელაურის მიდამოებში. გავრცელებულია აღმოსავლეთ და სამხრეთ საქართველოში.
