ინდუცირებული ბოდვა
ინდუცირებული ბოდვა - ზოგჯერ ადამიანს, რომელიც ახლო ურთიერთობაშია მეორე პიროვნებასთან, რომელსაც უკვე ჩამოყალიბებული აქვს ბოდვითი სისტემა, იგივე იდეები უყალიბდება. ყველაზე უფრო გავრცელებული ტერმინია folie â deux. თუმცა, ის ICD-10-ში მოცემულია, როგორც კატეგორია - გაზიარებული ბოდვითი აშლილობა, ხოლო DSM-IV-ში - როგორც ინდუცირებული ბოდვითი აშლილობა. მას, თანაზიარ შეშლილობას უწოდებდნენ. ზუსტად არ არის ცნობილი ინდუცირებული ფსიქოზის სიხშირე, მაგრამ ის არცთუ ისე ხშირად გვხვდება. ზოგჯერ ინდუცირებულ ფსიქოზში ორ ადამიანზე მეტია ჩართული (folie á plusieurs), მაგრამ ეს ძალზე იშვიათია. არსებობს მოსაზრება, რომ ზოგიერთი აპოკალიფსური კულტი ამ ტიპის ფენომენებს შეიცავს.
დაფიქსირებული შემთხვევების 90%-ზე მეტი ადასტურებს, რომ ეს ადამიანები ერთი და იმავე ოჯახის წევრები არიან. ჩვეულებრივ, არსებობს ფიქსირებული ბოდვის მქონე დომინანტური პარტნიორი, რომელიც, როგორც ჩანს, უნერგავს დაქვემდებარებულ ან სუგესტიურ პარტნიორს მსგავს რწმენას (ზოგჯერ თავდაპირველი წინააღმდეგობის გაწევის შემდეგ). რეციპიენტთან ეს რწმენა შეიძლება იყოს ან არ იყოს ჭეშმარიტად ბოდვითი ხასიათის. ჩვეულებრივ, ეს ორი ადამიანი დიდი ხნის განმავლობაში ცხოვრობს ერთად, ხშირად გარე სამყაროსგან იზოლირებულად, და მათ ახლო, ინტიმური ურთიერთობა აქვთ. დამკვიდრდება რა ერთხელ, ეს მდგომარეობა ქრონიკულ სახეს იძენს.
ჩვეულებრივ, ზეგავლენის ქვეშ მყოფ ადამიანს ურჩევენ, დაშორდეს თავის პარტნიორს, რადგან სწორედ ამ გზით პარტნიორი შეიძლება გამოვიდეს კვაზი-ბოდვითი მდგომარეობიდან. პაციენტს უნდა ჩაუტარდეს მკურნალობა, რომელიც ჩვეულებრივი ბოდვითი აშლილობის დროს ტარდება ხოლმე (Silveira and Seeman, 1995).
