ალტის ჰობოი

ალტის ჰობოი - ინგლისური ქარახსა, ხის ჩასაბერი საკრავი, წარმოიშვა XVIII ს. სანადირო ჰობოისაგან (oboe dicaccia), რომელიც თავის მხრივ წარმოიშვა ალტის ბომბარდისაგან. ინგლისური ქარახსის მილი საგრძნობლად გრძელია ჰობოისაზე და მთავრდება მსხლისებური ფორმის ყელბუკით, ენაკი ჩამოცმულია ოდნავ გაღუნულ ლითონის მილზე, სარქველების რაოდენობა 15-18-ია. ინგლისური ქარახსის ბგერა უფრო მქრქალია, ვიდრე ჰობოისა, რამდენადმე „მელანქოლიური“ ხასიათისაა. საკრავის წყობაა in F ე. ი. კვინტით ქვემოთ ჰობოისთან შედარებით. თუ ნოტებში (ინგლისური ქარახსა ნოტირებულია ვიოლინოს გასაღებში) წერია პირველი ოქტავის „დო“, ფაქტიურად იჟღერებს მცირე ოქტავის „ფა“ და ა. შ. ამიტომ მელოდია ინგლისური ქარახსისათვის იწერება კვინტით ზემოთ რეალურ ჟღერადობასთან შედარებით. ინგლისური ქარახსის დიაპაზონი ნოტაციით ვრცელდება მცირე ოქტავის „ფა“-დან მე-3 ოქტავის „სი ბემოლამდე“; ჟღერს კვინტით ქვემოთ.

წყარო

ხელოვნების განმარტებითი ლექსიკონი