თორაძე ლექსო
თორაძე ალექსანდრე (ლექსო) დავითის ძე - [30. V. 1952, თბილისი], ქართველი პიანისტი.
1969 თორაძე ჩაირიცხა თბილისის კონსერვატორიაში (პროფ. ე. გურევიჩის კლასი). 1970-იდან სწავლა განაგრძო მოსკოვის კონსერვატორიაში, რომელიც დაამთავრა 1975 (ბ. ზემლიანსკის კლასი), ხოლო 1978 – ამავე კონსერვატორიის ასპირანტურა (პროფ. ლ. ნაუმოვის კლასი). 1969 იგი მუსიკოს შემსრულებელთა ამიერკავკასიისა და საკავშირო კონკურსების ლაურეატი გახდა. 1975 იტალიაში ა. კასაგრანდეს სახელობის საერთაშორისო კონკურსში მიიღო III პრემია, ხოლო აშშ-ში ვან კლაიბერნის სახელობის საერთაშორისო კონკურსზე – II პრემია.
თორაძის შესრულებას ახასიათებს მასშტაბურობა, ვირტუოზულობა, არტისტული ტემპერამენტი. მისი რეპერტუარი მოიცავს სხვადასხვა სტილის ნაწარმოებებს. თორაძემ აღიარება მოიპოვა მოცარტის, ლისტის, პროკოფიევის, რახმანინოვის და სხვ. ნაწარმოებთა შესრულებით.
1983-იდან თორაძე ცხოვრობს აშშ-ში და ეწევა ნაყოფიერ საშემსრულებლო და პედაგოგიურ მოღვაწეობას. აღიარებულია როგორც თანამედროვეობის ერთ-ერთი გამოჩენილი პიანისტი. ქ. საუთბენდში (ინდიანას შტატი) ადგილობრივ უნივერსიტეტში დაარსებული აქვს მუსიკალური სტუდია, რომელმაც აღიარება მოიპოვა, როგორც მუსიკალურ აღმზრდელობითმა ცენტრმა. აქ თავიანთ ოსტატობას სრულყოფენ მთელი რიგი ახალგაზრდა ქართველი პიანისტები. (გ. ტორაძე)
