თეთრყვავილა
თეთრყვავილა - Galanthus alpinus
ქართლ., სომხით.-თეთრი ყვავილი, ტყის ნიორი, კახ.-თეთრი ენძელა, მთიულ.-მთის ნიორი, ფშავ., თუშ.- ყვავთნიორა, რაჭ.- წვადინელა, იმერ.- მწვადინელა, გურ., იმერ.- ცხენისკბილა, ჭან.-მტკუი ლეი, მტკუი ლერი, მეგრ. - ჯამკვატარა
თეთრყვავილა ეკუთვნის ნარგიზისებრთა ოჯახს. საქართველოს მთასა და ბარში სხვადასხვანაირი თეთრყვავილა იზრდება. ორი მოგრძო ფოთოლი უვითარდება ბოლქვიდან. ჩვენს ტყეებსა და ბუჩქნარებში ჯერ კიდევ თოვლი დევს ხოლმე, რომ თეთრყვავილას უკვე ამოტანილი აქვს თავისი ერთადერთი, თეთრი თავდაკიდებული ყვავილი. ზოგჯერ იგი თოვლის საბურველსაც გახვრეტს ხოლმე და ისე ამოაქვს ყვავილი.
ყვავილობა დიდხანს გრძელდება. გვირგვინის ფურცლები თეთრია. მათგან სამი უფრო დიდია, ხოლო შიგნითა სამი — უფრო პატარა, ბევრად მოკლე და მწვანე ლაქით მორთული. ზაფხულში თეთრყვავილა ქრება და მიწაში მხოლოდ ბოლქვიღა რჩება.
