თაბაგარი თეა
NPLG Wiki Dictionaries გვერდიდან
თაბაგარი თეა – (1985), პოეტი. დაიბადა ჭიათურაში. 2002 წელს დაამთავრა თბილისის 142-ე საშუალო სკოლა, 2007 წელს კი – ილიაუნის ფილოლოგიის ფაკულტეტი. პირველი ლექსი 5 წლის ასაკში დაწერა. 13-14 წლიდან წერს ინტენსიურად. 2008 წელს გამოვიდა მისი ლექსების პირველი კრებული „დუმილი ისმინე”, 2012 წელს კი მეორე კრებული – „დაბრუნებამდე”; რამდენიმე ლექსი დაბეჭდილია ჟურნალებში „ლიტერატურული პალიტრა”, „ლიტერატურა და ხელოვნება”, „ხორნაბუჯი”. ბოლო წლების ლექსების ძირითადი ნაწილი ინტერნეტ-სივრცეშია განთავსებული.
- ფერეიდნელი მგზავრის სიმღერა
- ცა ჰგავს დიდებულ სპარსულ ხალიჩას,
- ან მოზაიკას ძვირფასი ქვებით,
- იქვე წითური მთვარის თვალი ჩანს,
- დედამიწას რომ დაჰყურებს ქვევით.
- ამქვეყნად ყველა საავდრო ღრუბელს,
- ხომ უსათუოდ გაუდის ფერი,
- თუკი უეცრად არ დავიღუპე,
- მე უნდა მოვკვდე ქართულ სიმღერით.
- გემშვიდობები, გამზრდელო მიწავ,
- რამდენჯერ მოგრწყე ცრემლით, ვინ იცის,
- არ იფიქრო, რომ უმადური ვარ,
- ფერეიდანო, შენი თბილი ცის.
- ოცნებებისკენ მიხმობენ გზები,
- მივეახლები იმედს კარღიას,
- სხვა არაფერი ამგვარი გზნებით,
- არ მინატრია, არც მიდარდია.
- დრო სისხლში გამჯდარს დასაბამიდან,
- სამშობლოსადმი სწრაფვას ვერ მოშლის,
- მე ცისარტყელას მხრებზე დავისვამ,
- რომ ჩავიტანო საქართველოში.