ზევსის ქანდაკება ოლიმპიაში
ზევსის ქანდაკება ოლიმპიაში − (ინგლ. Statue of Zeus at Olympia), მსოფლიოს შვიდი საოცრებიდან ერთ-ერთი. ის ფიდიასის ნამუშევარია (დაახლოებით ძვ. წ. 430); დამზადებული იყო ხისგან და მოპირკეთებული ოქროთი და სპილოს ძვლით. ზევსის ქანდაკება – ერთადერთი მსოფლიო საოცრებაა, რომელიც ევროპის კონტინენტზე აღმოჩნდა. ბერძენი გეოგრაფის, პავსანიას (პავსანიუსის) მიხედვით, ზევსის ქანდაკების სიმაღლე 13-დან 17 მ შეადგენდა. დარბაზის ბოლოს მჯდარი ზევსი თავით ჭერს ებჯინებოდა. წელს ზევით შიშველი ზევსი ხისგან იყო დამზადებული. მის ტანს მოვარდისფრო, თბილი სპილოს ძვლის ფირფიტები ფარავდა, სამოსს – ოქროს ფოთლები, ცალ ხელში ნიკეს, გამარჯვების ქალღმერთის, ქანდაკება ეჭირა, მეორე ხელით კი იგი მაღალ კვერთხს ეყრდნობოდა. ზევსის სავარძელი სპილოს ძვლის ბარელიეფებითა და ღმერთების ოქროს ქანდაკებებით ყოფილა დამშვენებული.