ვარსკვლავთა რუკა
ვარსკვლავთა რუკა – (map of stars, star map, star chart), დედამიწიდან ხილული ცის თაღის მნათობების გამოსახულება სიბრტყეზე ცის კოორდინატთა სისტემაში. რუკებს აგებენ ჩრდილოეთი და სამხრეთი ნახევარსფეროებისათვის ცალკ-ცალკე. იყენებენ ცილინდრულ (ეკვატორული სარტყელი), კონუსურ (ზომიერი სარტყელი), აზიმუტურ (პოლარული სარტყელი) და გნომონურ პროექციებს. ვარსკვლავები პროექციის ბადეზე დააქვთ ვარსკვლავთა კატალოგის კოორდინატებით (საათები გრადუსების ნაცვლად). ვარსკვლავების სიკაშკაშის ხარისხი გამოისახება სხვადასხვა დიამეტრის წრეებით. გნომონურ პროექციებს იყენებენ ფოტოგრაფიული რუკებისათვის, რომლებიც კარტოგრაფიულ ბადეზე ცის მონაკვეთის ფოტოსურათების მონტაჟია. ამჟამად სარგებლობენ ვარსკვლავთა ელექტრონული კატალოგებით და კომპიუტერში აგებენ ვარსკვლავიური ცის ნებისმიერი მონაკვეთის რუკას.
