ერისთავი იესე (პოეტი)
ერისთავი იესე – (17?? – 1745), ქსნის ერისთავთა შთამომავალი. კახეთის1660 წლის აჯანყების ერთ-ერთი მეთაურის, შალვა ერისთავის შვილიშვილი. ძველი ქართული ტრადიციის მიხედვით შექმნა ორიგინალური საგალობელი „წმიდათა და დიდებულთა ორთა ძმათა მოწამეთა ქართველთა ელიზბარ ქსნის ერისთავისა და ძმისა მისისა შალვასი და წმიდისა დიდებულისა მოწამისა ბიძინა კახისა” (საგალობელს აქვს აკროსტიქი – „ქრისტეს მოწამეო შალვა, შეიწყალე ძის ძე შენი იესე”). საგალობელი კახეთის 1660 წლის აჯანყების გმირთა – შალვა და ელიზბარ ერისთავებისა და ბიძინა ჩოლოყაშვილის – ხოტბაა; თავდაპირველად მასში არ იყო ასახული აჯანყების ამბები. მოგვიანებით, თხზულების ეს ხარვეზი ნაწილობრივ შეავსო ბესარიონ ბარათაშვილ-ორბელიანმა, რომელმაც თავის ჰაგიოგრაფიულ კრებულში იესე ერისთავის საგალობელი შევსებული და რედაქტირებული წარმოადგინა. იესე ერისთავს უნდა ეკუთვნოდეს კახეთის აჯანყების გმირებისადმი მიძღვნილი სვინაქსარული საკითხავიც.