დამძაბავი ცემენტი
დამძაბავი ცემენტი − სწრაფადშემკვრელი და სწრაფადმყარებადი ცემენტი, რომელიც მიიღება განსაზღვრული რაოდენობის პორტლანდცემენტის კლინკერზე (65%) გაფართოებადი დანამატების დამატებით. დამძაბავი ცემენტი გამაგრებისას ფართოვდება, რის შედეგადაც წარმოქმნილი დაწოლა გამოიყენება არმატურის დასაძაბავად რკინაბეტონის კონსტრუქციებში. ის თვითდამძაბავ კონსტრუქციებში უზრუნველყოფს ბეტონის გაფართოებას დროის იმ მონაკვეთში, როცა ის აღწევს 15 მპა-ზე მეტ სიმტკიცეს, რაც უზრუნველყოფს არმატურასთან აუცილებელ შეჭიდულობასა და დაძაბვის პირობებს. ამასთან რეალიზდება ორ- და სამღერძა დაძაბვა, რაც მექანიკური გზით ძნელი მისაღწევია. გაფართოებადი დანამატის ნედლეულად გამოიყენება მეტალურგიული, სათბობ-ენერგეტიკული, სამთოენერგეტიკული, სამთოგამამდიდრებელი, კერამიკული და ქიმიური წარმოების ნარჩენები. დამძაბავი ცემენტი გამოიყენება მიწისქვეშა, წყალქვეშა და სადაწნევო ნაგებობებში, თვითდამძაბავ ბეტონში, გზებისა და აეროდრომების საფარში, სასპორტო და საქალაქო ნაგებობებში, მილების წარმოებაში და სხვ.