გრეტრი ანდრე

ანდრე გრეტრი

გრეტრი ანდრე ერნესტ მოდესტი - ფრ. André-Ernest-Modeste Grétry (8 ან 11. II. 1741, ლიეჟი, – 24. IX. 1813, მონმორანსი, პარიზის მახლობლად), ფრანგი კომპოზიტორი, წარმოშობით ბელგიელი. საფრ. ინსტიტუტის წევრი (1795).

გრეტრი მუსიკას სწავლობდა ჯერ მამასთან, 1759-66 კი იტალიაში (1765 ჩაირიცხა ბოლონიის მუსიკალურ აკადემიაში). 1767-იდან ცხოვრობდა პარიზში. გრეტრმა დაწერა 60-მდე ოპერა, მ. შ. „გურონი“ (1768), „ლუსილი“ (1769), „რიჩარდ ლომგული“ (1784), „პეტრე დიდი“ (1790), „ვილჰელმ ტელი“ (1791) და სხვ. გრეტრის შემოქმედება, რომელზეც დიდი გავლენა მოახდინა ენციკლოპედისტების, განსაკუთრებით კი, ჟ. ჟ. რუსოს ესთეტიკამ, მნიშვნელოვანი ეტაპია XVIII ს. ფრანგული ოპერის ისტორიაში. მან საფუძველი მოუმზადა XIX ს. ფრანგულ ლირიკულ ოპერას. გრეტრი ინსტრუმენტული ნაწარმოებებისა (სიმფონია, კვარტეტები და სხვ.) და რამდენიმე ლიტერატურის ნაშრომის ავტორია. მისი „მემუარები“ ფრანგული სენტიმენტალიზმის ესთეტიკის მკაფიო ნიმუშია.

წყარო

მუსიკის ენციკლოპედიური ლექსიკონი