პატროკლე მაკედონელი სტრატეგოსი
პატროკლე მაკედონელი სტრატეგოსი – ავტორი გეოგრაფიული თხზულებისა, ცხოვრობდა სელევკე I-ისა და ანტიოქე I-ის დროს, ძვ. წ. IV-III სს. მიჯნაზე. იყო კასპიის ზღვის მიმდებარე მხარეების მმართველი. სელევკე ნიკატორის ბრძანებით. პატროკლე ძვ. წ. 285, ან ძვ. წ. 283|82 იკვლევს კასპიის (პირკანიის) ზღვას. მეტად ნიშანდობლივია, რომ სწორედ პირკანია გახდა კონკრეტული ექსპედიციის შესწავლის ობიექტი. ინდოეთთან სამდინარო ტრანსკავკასიური ვაჭრობის მარშრუტის ეტაპებიდან – ფაზისი (რიონ-ყვირილას მაგისტრალი), კიროსი (მტკვარი), კასპია, ოქსოსი (ამუდარია, რომელიც მაშინ კასპიის ზღვას ერთვოდა), მდინარე ბაქტრა (ბალსი) – ის ერთადერთი იყო, რომელიც ბერძნულ უშუალო ემპირიზმს არ ექვემდებარებოდა. პატროკლემ დაადასტურა კასპიის ზღვის დამაკავშირებელი ჰიპოთეტური ფუნქცია. ასე ჩაეყარა საფუძველი ინდური საქონლის ტრანსკავკასიურ ტრანზიტს პონტოსკენ. ეს შესაძლებლობა, ნაწილობრივ, განაპირობებდა ანტიკური კაპიტალისტური საზოგადოების ცხოველ ინტერესს კოლხეთისა და იბერიის მიმართ. პატროკლეს მოხსენება-პატაკს ჩვენამდე არ მოუღწევია, ამ ინფორმაციით ბევრ სხვა ავტორს უსარგებლია.
ლიტერატურა
- დუნდუა თ, კოლხეთი, იბერია და პონტოს სამეფო ნუმიზმატიკური მასალების მიხედვით, თბ., 1993;
- ლორთქიფანიძე ო. ანტიკურ ხანაში ინდოეთიდან შავი ზღვისკენ მიმავალი სატრანზიტო-სავაჭრო გზის შესახებ. – „საქ. სსრ მეცს. აკად. მოამბე”, 1957, ტ. 19, №9, გვ. 377-383;
- ივ. ჯავახიშვილის სახ. ისტორიის ინსტიტუტის შრომები, ტ. 2, თბ., 1956, გვ. 161-180.
