გამგებელი ნუგზარ
გამგებელი ნუგზარ ვალერიანის ძე - (5. IX. 1959, საჩხერის რაიონი), ქართველი მომღერალი (ტენორი). ფ. ვინიასის (ბარსელონა, 1990, I პრემია და გრან-პრი), ვ. ალონსოს (მადრიდი, 1993, I პრემია) სახელობისა და პამპლონის (ესპანეთი, 1994, II პრემია, ხ. კარერასის სპეციალური პრიზი), ვოკალისტთა საერთაშორისო კონვურსების ლაურეატი.
1987 დაამთავრა თბილისის კონსერვატორია (პროფ. ნ. ანდღულაძის კლასი). 1990-იდან თბილისის ოპერისა და ბალეტის თეატრის წამყვანი სოლისტია, ფლობს ლამაზი ტემბრის ხმას. გამგებელის შესრულებისათვის დამახასიათებელია გამომსახველობა, ექსპრესია. პარტიები: აბესალომი, მალხაზი (ზ. ფალიაშვილის „აბესალომ და ეთერი“, „დაისი“), კოტე (ვ. დოლიძის „ქეთო და კოტე“), ალფრედი, რიჩარდი (ჯ. ვერდის „ტრავიატა“, „ბალ-მასკარადი“), ანტონიო და მეფისტოფელი (ს. პროკოფიევის „დუენია“ და „ცეცხლოვანი ანგელოზი“) და სხვ.
ეწევა საკონცერტო მოღვაწეობასაც. 1996-იდან უცხოეთშია (ესპანეთი). (გ. ტორაძე)
წყარო
მუსიკის ენციკლოპედიური ლექსიკონი
